30 сент. 2013 г.

!

Туннэ ветлӥм мадьяр кино учкыны УдГу-лэн актовой залаз. "Тӧдьы кырымпыдэсъёс" нимаське. Гимнаст сярысь, кудӥзлэсь возьмато улонзэ. Секыт кино. Мон понна. Мынэсьтым таӵе киноос сюлэмме вӧсь каро. Возьмато кызьы вӧсь карыса, тренерзы гимнаст луонъёсты  дышетэ. 

Адямиез трос вал мон понна.http://instagram.com/p/e4vrCZkDgO/ 

Мон кожасько вал, что ӧжыткес люкаськозы.

Ми - Таня, Лиля, Марайко но мон пуксимы гань-гань нырысетӥ рядъёсы. Кызьы Дарали шуиз: "Банда". :)
 Вот, зэм но, удмуртъёс туж ярато вераськыны не в том месте, не в то время. Марайко мар ке шыпыртыса Танялы вераны кутскиз кино мыныку. Дарали берытскыса: "Эн зуль!".Серем ик потӥз:). Куддыръя Удмурт Филологиен параос дыръя озьы вазем потэ...:)

Собере вуи на Амисо Вотъёслэн репетициязы. Шулдыресь. Мусоесь. Ортчемесь. Пересьмиллямгес :) 2 час оломар дауртыса кыллизы :). Дасяськиськом, пе, 17 числолы.

29 сент. 2013 г.

Нунал. Огшоры.

Ӵукна звонить каре эше. Адӟем 3 Светаос программаез. "Мон 5 минут учкыса пуки тон-а, ӧвӧл-а шуыса. Ӧй но тодма тонэ, ява". Мон, если честно, ачим асме ӧй тодма учки но. Вокщё мукет ныл пуке Светаосын вераськыса :).

Перепечкинын пукиськом Иннаен (эше мынам). Тани та мусо ныл Сьӧлтаысь:)http://instagram.com/p/e11qCmkDkH/  Мон заказать кари зыретэн табань, нош со перепечъёс. Со юа:
-А тӥляд табань зыретэн гинэ-а лэсьто?
-О-о
-А милям сӥлен но сугонэн каро на.
-Милям сиёнъёсмы простоесь. Перепечмы но картошкаен гинэ. Тӥ палъёслэн со вычурной кыӵе ке. Перепечъёс но турынэн.

Ӝыт ветлӥмы Грифонэ. Отын Таня Репина кылбуръёсын книгазэ возьматӥз: http://instagram.com/p/e2bCOfEDoi/ . Мон малы ке кожасько вал, что отын трос филологиысь адямиос луозы. Йӧназ ӧй вал малы ке.
Туж тунсыко но визьмо  гожъяське со. Мыным кельше. Секытэсь ке но. Йырвизь сын. Одӥг кылбурзэ каждой раз лыдӟыса пӧртэм смыслзэ аслыз шараяськод. http://instagram.com/p/e2as9TEDn1/



28 сент. 2013 г.

Светаос дорын куноын.

Туннэ ветли куное:)

Мынон азям мыным шуизы: "Да нууу.. Мар сыче дурацкий передачае мынэмед потэ? Тунсыко овол. " Нош мыным тунсыко потиз адзыны, кызьы вообще снимать каро передачаосты, атмосфераяз пырыны. 

Толон еще Бикузин эш "бышкыса" вера: "Мар, кизили. Тон ведь милям табере кизили?"
Мон: " Овол".
Бик:" А неправильногес юанме пукти. Ку тон сайкад кизилиен?"
Мон со шоры шузи шоры кадь учкыса: "Мон асме кизилиен не считаю".
Бик:" Вот, вот. Тон отнекиваешься ини. Со кизилэн признакез".
Ой, мын ай мунчое ас поннам малпай мон.

Кошкемыт ик вал маке камера азьын пукыны. Мар верамме но уг тодиськы ни кадь :). Тужгес но муспотон йотиз Кибардина. Может соин, что со Алнаш палъёсысь :). Тем более со Кибьяысь. Мон отысь трос кинэ тодисько. Вераськемзэ кылисько но эшъёсме син азям пуктисько. Тунсыко кадь. Мыло-кыдо нылкышно.

Ураме поти но мылкыд куашказ. Куазь ямсыз кариськем. Доре, гуртам берто малпасько вал. То: л потэм, зоре. Остановкаозь кыдёкегес ик мыноно. Жингырти таксилы. Чапак мыныкум таксиен телефон пыр вераськи эшеным. Удмурт сямен. Вераськем берам таксист шуэ: " Вот ведь какая молодец". Мон со шоры вопроосительно учки. Со:"Говоришь на своем языке. Ато живу в родном городе и слышу всякую речь, но не удмуртскую. А ты вот говоришь. Не каждый день услышишь. Стыдятся что ли разговаривать на своем родном языке?" Анаез, пе, удмурт вылэм Агрыз ёросысь, зуч гуртысь кудаз ваньзы удмурт сямен верасько, солэн верамезъя. Практика, пе, уг тырмы. Некинэн городын вераськыны удмурт кылэн. Соин ик, пе, вуниз. Вот. Сыче таксистэн вераськи туннэ.

27 сент. 2013 г.

Вераськонъёс.

Ну одӥг адями делится аслаз впечатлениосыныз: "Поздеев - со странной адями. Вроде собыдӟа ужъёс лэсьтэ, а со сярысь нокин но номыр уг тоды. Маин улэ со, кыӵе малпанъёсын. Со, наверно, только матысь адямиосызлы гинэ усьтӥське".

Мхм, скрытной персонаж удмурт "тусовкаын". Кудӥз со удмурт "тусовкалы" трос лэсьтэ.

Со ик адями шуэ мыным Юмшанысь (мерлыко бамысь. Вот выль удмурт кылъёс кутылоно же вераськонын :)) иворъёсты учкыса: "Хм.. Тани та чувак маин ке тыныд кельше http://vk.com/nikita_gum ."

Серекъяй. Вроде бы, со удмурт филологиысь. Собере тодам лыктӥз биология урокын дышетӥсьмылэн веранэз, что кышноен карт луоноос ог-огзылы кельшо, пе. Бррр.. Эшшо мар ке ӧвӧл-а?:)

Ӟуч ныл кылзэ Белослудцевез. Ми мар ке долкаса со шоры учким. Со: "Дк, а чтооо? Это как английская песня - ничего не понимаешь, но нравится.."http://vk.com/id7003958?w=wall7003958_1256%2Fall

Автобусын мынӥсько. Ныл азям пуке. Вань чиньыосаз зарни чебертэм зундэсъёс (даже одӥг чиньыяз кыкен тыремын). Со туж чебертэм адӟиське, на самом деле. Недаром 17-18 дауръёсы, пе, шуо вал, что ныл, кудӥз чиньыосаз нуллэ кыклэсь трос зундэс - уйбубыли выллем. Вот так вот. http://vk.com/krowawaja?z=photo71708048_309358965%2Fphotos71708048 Эн нуллэ чиньыосады трос зундэсъёс.

План-кабан: былогиняослэн выходкаоссы. Рольёсты до конца шудоно ук)

25 сент. 2013 г.

Таш-таш

Толон ӵукна пара азьын одногруппникъёсы вискын вераськон кылдӥз: кинъёс соос луозы дышетсемзы бере. Огез шуэ:" Вот Марину, например, я вообще учительницей не представляю".
Мукетыз: "Да, да. Я тоже". Мон соос шоры паймыса учкисько ини ай. "Я представляю ее радиоведущей, например. Или что-то в этой сфере"- шуэ мукетыз. Мыняй гинэ. Собере пара ортчем бере звонить кариз Кибардина. Мон пайми. Со понна неожиданно вал туж.

Марайкоен ӵошен мынӥмы радиое:) Кытысь-марысь потӥз Бикузин. Кудӥз Саша. Паймеменым ӝӧк улӥсь потӥз кожай:) Сразу пелепонзэ поттӥз но инстаграммить карыны кутскиз. Ваньзы ӟеч гинэ ужало ужан интыязы. Тӥни серьезно пуке Ваулина. Даже непривычно кадь сое сыӵе серьезноен адӟыны. Атмосфераез туж ӟеч потӥз мыным татын. Мусо кыӵе ке.

Ваизы Кибардина доры. Блогъёсты сярысь туннэ, пе, вераськом (аха, ачиз лыдӟымтэ но мар сярысь ми вообще гожъяськиськом :)). Бикузин милесьтым юа: "Тӥ бон ӧд на жугиське на?" :)

Марайко молодец. Кылыз вӧлямын. Умой вераське. Нош мон дыг-мог. Кибардина шуэ: "Усо палъёс но таш-таш удмурт сямен верасько вылэм. Ми палъёс кадь". (со, пе, Шадрасак-Кибьяысь. Оти, уго, Ӟатчаос, Лялиос, Кибьяос таш-таш ым тросазы верасько удмурт кылын)


Ӟеч нунал ортчиз.

24 сент. 2013 г.

Ӟучомем. И мар?

Мон, конечно, валасько вал, что блог нуыны кутски ке, сое лыдӟозы. Но. Мон ӧй малпа вал, что  сое кытчы ке постить карозы шуса. Валасько вал, что кинлы ке кельшоз, кинлы ке уз. Но. Тросэзлы уггес кельшы, видимо. "Вооот,- шуо,- ӟуч кылъёс трос гожъямъёсам, нокыӵе синтаксисэз ӧвӧл, лексика никакущий".(ма филолоос верало ни. Кинъёс на :)). Ӟучомем. Но мон ведь гожъясько озьы, кызьы вераськисько. Тазьы гожъяса мыным аслым каньылгес, лыдӟыны но секыт ӧвӧл (тросэз шуо, что каньыл лыдӟыны). Чебергес гожтыны турттыса, удмурт кылэ ваньзэ берыктыны турттыса, куддыръя вокщё гожтэме уг пӧрмы. Мыным школаын но туж секыт вал удмурт кылын сочинение гожтыны (блин, асме али не патриот кожаны кутскисько :)). Ӟуч кылын сочинениосме мактало вал. Ма, конечно. Ӟуч кыл всё равно узыргес. Отын одӥг существительнойлы незнай кӧня прилагательной бырйыны луэ. Удмурт кылын бырйыны кутскисько ке, гуньдӥсько кадь. Куке но одӥг адями шуиз вал: "Удмурт дуннелы ӧй гожтӥськы ни. Словарез кутыса лыдӟыны кулэ ни сое. Ваньзэ удмурт кылэ берыктын турттыса шузимо кадь ни".

"Ооо,- шуо, - да тӥ озьы удмурт кылэз быдтӥськоды ӟуч кылъёсты пыртаса". Дак, блин, будто бы ӟуч кыллэн сыӵе йырвисёнэз ӧвӧл. Ӟуч кылад но кӧня заимствованиос. Али кылъёс, кудъёссэ тӥ шуоды да, конечно, со ӟуч кыл, пыремын олокыӵе но кылъёсысь и совсем ӟучесь ӧвӧл. Просто время соосты ӟучомытӥз. Например, думаете карандаш ӟуч кыл? Чик но ӧвӧл.

Милям ӟуч филологиысь дышетӥсьёс тоже нургето, что трос заимствованиос, что соосын жагтӥсько.

 Мыным потэ, котькуд кыллэн сыӵе йырвисёнэз вань. Сомында кылъёслэн ог-огенызы взаимодействовать карытэк улэмзы уз луы.

22 сент. 2013 г.

Котькудӥзлэн аслаз философиез. Котькытын аслаз философиез.

Туннэ дуно но яратоно эшмылэн вордӥськем нуналыз. Бикузин! Самой умойзэ гинэ тыныд.

Ветлӥмы Кеч парке пукыны. Картошка пыжимы. Ческыт вал. Кин мар дорысьтыз ваиз. Кинлэн мар. 
Чимали: "Мон яратӥсько пыжем картошкалэсь кӧмзэ но сиыны". 
Мон: "Мон но. Мынам песяй пичи дыръям шуэ вал, что курдасьтэм луо. Кионлэсь, гондырлэсь уг курда". 
Бикузин: "Эгыреныз можно суредаськыны". 
Юля (спортфакын дышетске): "Эгыр - со эмьюм. Кӧт уз висьы". 
Гуня (как-то не в тему): "Мон пичи дыръям туж висись вылӥськем и монэ пелляськисьёс тыриллям гур пушкы. Собере, пе, сразу йӧнаськем". 

Котькудӥзлэн аслаз философиез :) Кстати, со философия сярысь маке кык нунал ини кылӥсько. Толон ветлӥ киное. Стив Джобс сярысь. Отын тожо философия сярысь. Собере одӥг адями, валэктӥз малы 3 Светаослэн студиязы копак тӧдьы (отын, пе, аслаз философиез): "Ну.. Тӧдьы цвет со же нылкышноослэн цветсы..Чылкыт малпанъёс, чылкыт пуш дунне...Да ну нах**, мар валэктӥсько ини. Уксё ӧй вал но тӥни". Озьы инь..

Собере шузияським. Эгырен зыраським. Пичи пиналъёс кадь). Куддыръя со полезно, дыр. Шузияськыны. Тросгес кулэ.


20 сент. 2013 г.

Юмшай. Луиз мар ке

Ветлӥ Маркено луоз патие. Фотое пуктылӥсь ук, типа. Аха. Адямиез сомында люкаськиз, что шоканы омырез ӧй вал кадь. Вань мылкыд фотое пуктылыны быриз. Лёгиськон интыез ӧвӧл. Эктыны султӥ: Бертӥ донгыса лэзё, гырпумзы кызьы нырвыжые уг ву ява. Ваньзы ог-огзэс утчаса ветло. Позыръяськонэ вуид бере - экты, солань но талань эн ветлы. Кыӵе ке зомбиос кадь ветло кудӟемъёс, мон кадь пичи мугоро адямиосты лёгаса но кельтозы азьысьтызы ке ӧд кошкы. Вообщем, ужас кыӵе ке. Танцполын кыӵе ке мунчоын кадь. Пӧсь, ваньзы шульыкмемын, противной зын потэ, духиос, одеколонъёс копак сураськемын, еще тамак, пиво зынэн "приправить" каремын. Нылъёс пиослэсь уг кылё. Озьы ик тамак пурккато, пыд йылазы мырдэм сыло..Юиськод ке визьмо юоно, дыр, со. В меру шуод-а мар-а..

Ваньзы укшало пуныослы, кудъёссэс лэзизы думетӥсь. Кыӵе ке сютэмесь кадь пиос учко нылъёс шоры, кызьы дӥльдызы уг вия (ма нылъёс но пӧртэмесь ӧвӧл). Ваньзылэн кыӵе ке мылкыдзы поръя. Будто мар ке но точно луоз. Ваньзы мар ке возьмало.

Особенно женской туалетын ажиотаж. Ваньзы кастинге дасяськиллям лэся..

Таӵе противно ноку но ӧй вал кадь на позыръяськонъёсын. Перебор кыӵе ке вал.

Бред сивой кобылы:) :

...-Сергеева, тон су***. Тон уд валаськы даже кыӵе тыныд повезло, что тонэ юмшанын постить каро...

...-Сергеева, кытысь потэм адями тон? Мын обратно Алнашад берт, тынад дырыд ӧз на вуы...

...-Басьтэ та мусо нылэз татысь, ато мон сое татчы ик кхе-кхе..изнасиловать каро..

..-Сергеева, уг кельшы мыным кызьы тон туннэ дӥсяськемын. Попсово кыӵе ке..(http://vk.com/bikuzin?z=photo14868474_310223261%2Fphotos14868474 гопник)

..-Мон ӧй вала, мар вообще та картаос тон киын каро? И малы тон вообще со картаосын вань?:)..Да еще и восьмерка..

:)

Ценить кароно эшъёсты, кудъёсыныз можно БВИын ӝӧк улэ(о-о, именно улэ) пуксьыса улон сярысь вераськыны. Мыным со уе куд-ог адямиос вокщё мукет палэнызы усьтӥськизы. Эшшо но золгес соосты яратыны кутски.

Обещал ведь Ю57 маркено луоз шуыса:)

18 сент. 2013 г.

Уй

Быдӟым уж ужаны толон потам эшеным 12 часэ уин) Гожъяським ӧжытак. Уд оске кыӵе кырӟан кылзыса потӥм)) Белослудцевлэсь :) "Кылзы сюлэмдэ" нимаське. Берло серекъяса тодамы сое ваим, Белослудцевез 3 огъяуллони палась адӟеммы бере. Кадр:)

12 часэ уйин Макдакын пуким. Отын шыпыт, адямиез ичи. Туж спокойно гинэ пуким.

Уин городлэн мукет улонэз. Жугиськон, вузаськон (малы ке кемалась адӟеме потэ ни вал сюрес дорын сылӥсь нылъёсты. :) Адӟи), юон. Вроде и спокойно, вроде и курдытгес. Эшшо мар ке дышетӥсьмылэсь юамзэ тодам ваи: "Кызьы тӥ малпаськоды, луэ- а уйин Ижтӥ курдатэк поръяны?" Собере оломар но малпаськын кутскиськод. Уин город кӧшкемыт чебер...

...-Со же страшно, потозы озьы машинаысь, но сюрес вылэ тонэ жугыса кельтозы.
-Ма оломар но луэ.
-Адямиослэн ӟечсы неужто кылемын ӧвӧл. Кызьы вот озьы можно жугыны?
-Соин ик со улон. Ваньмыз ке ӟеч луысал, тунсыко ӧз луысал улон.
-Со туж жестоко...

Мынам ӵужай учке ке обычно телевизорысь иворъёсты, лыдӟе ке газетъёсты весь шуэ: "Неужто таӵе шулдыр вакытэ адямиослэн ӟечен улэмзы уг луы?! Ваньмыз вань. Но весь адямилы мар ке уг тырмы, весь виё, вандо, ыбо...Кыӵе улонэз но адӟод вылэм..." "Бон эн лыдӟы,"- шуисько. Всё равно тодэмез потэ. Ма ачим но лыдӟисько но, адӟисько но. Хотя отын сомында негативез. Малы лыдӟисько газетъёсты? Со важно, всё равно. Тодыны кулэ мар дуннеын луэ. Мон асме куддыръя заставляю, например, лыдӟыны со статьяосты, кудъёсыз войнаосын герӟаськемын. Мон малпамъя, туала адями кулэ улыны али нуналъёсын, тодыны мар луэ со котырын но анализировать карыны. Со ведь тоже куке история луоз, кудзэ куке но дышетозы книгаосъя. Дышетӥсьмы шуиз вал кудаз ке параын: "Вот идёт человек по лесу, ему всё интересно, а всё потому, что он знает названия трав, деревьев.  У него восприятие мира шире (он интересуется всем), поэтому ему интересно".

Пыдъёс косказы. Сомында пыдын ветлӥм. Малпаса али, чик малпаме уг поты кадь)

..."Пукыны госсовет но Кузёбай Герд вискын и юыны Пензаысь лимонной ликер бесценно"...(с)

17 сент. 2013 г.

Вакчияк

Туннэ правоведениен дышетӥсьмы малпанзэ вераз асфальт вылэ гожъямъёс сярысь. "Вот,- шуэ,- со туж умой ку адями аслэсьтыз яратонзэ озьы возьматэ. Со туж мусо. Но мыным уг кельшы ку подъездъёсын суредасько. Мукет дело, ку асфальт вылэ. Хоть кӧня гожъяськы".
Мон собере малпай, что одӥг пол но городысь ӧй на адӟылы удмурт сямен гожъям признаниос. Ӟучъёсыз мар ке мында, нош удмуртъёсыз чик но ӧвӧл.

Гожъялэ. Возьматэ яратэмдэс)

15 сент. 2013 г.

Пелляськисьёс но супыльтисьёс

Вот пукиськод нылкышноосын, пересьёсын чай юыса и кылиськод оломар но. Вань слухъёсты, сплетняосты. Ужасно со, на самом деле. Сомында поток информации. Аламаез но, умоез но..Мар сярысь уг но верасько уг соос..Так омырез зуркатыса возё.

Кенакелэсь туннэ вордиськем нылзэ адзыны ветлимы. Мар ке пеллясь сярысь вераны кутскизы. Татын мон прислушалась (малы ке мыным та тема особенно тунсыко потэ. Вань со пеллясьёс, вединьёс, ишанъёс... Мынам та ласянь особенной впечатлениос улонам. Сюриськиз вал огпол. Ас синмыным сычезэ адзи...Бррр..Не для слабонервных шуо сыче дыръя. Веран ке кутски, наверно, ни за что но уд оске и шуоды, что такого не бывает. А пеллясьёслы мон оскисько. Соос зэм но юртто. Мынам чужатае пелляськись вал. Самой загадочной адями вал мынам улонам. Ну и еще одиг кадр, кудиз на вид раздолбай раздолбаем..но..тоже самой загадочной адями. Вот.) Так вот.. Мон прислушалась. Вань, пе, N гуртын пересь пелляськись. Со, пе, пичиосты гинэ пелля. Например, медаз бордись лу шуыса. "Ма, Коля туклячи (то бишь чужатае),- шуэ Оля кенак,- пельтиз вал Владикез (двоюродной выны) медаз могаса вераськы шуса. Юрттиз."
 Собере огез нылкышно вера: "Шайба (соседэ вань мынам. Толя нимыз :), правда ваньзы уг но тодо, дыр, солэн сыче нимыз шуыса, ваньзы сое Шайба шуо. Таза. Соин-а мар-а.), пичи дыръяз, пе, бордись вылэм. Нулдиллям сое пеллясь доры. Пеллясь косэм куинь бадзым сушка пыжыны и со куинь сушка пыр пичи шайбаез поттыны". Ну собере, видать, бордымтэ ини.
Только тани таче темаосын трос малы ке уг верасько. Мон хоть быдэс нунал кылзысал, дыр. Тунсыко ук.

14 сент. 2013 г.

Айда, илита

На самом деле, туж странной нунал. Вроде и кӧт тыриз, вроде и ӧз...

Нырысь параос бере роликъёсын ворттылыны ветлӥм одногруппникъёсыным. Шулдыр.

Ветлӥ Мумы доре "Чаль, илитае". Мон ведь "фотограф".
 Мар шуод? Номыр уд шуы. Визьтэмесь тӥ. Мыноно вал отчы. Со, на самом деле, туж необычно. Ку тӥ Мумы доре вуысалды на дискотекае. Отын туж приятной атмосфера. Мон отын нырысьсэ вал. Синмаськи. Пукимы ӝӧк сьӧрын, сӥлен табань сиим, чай юим. Тӥни сыӵе дискотека вал.

Собере неожиданностьёс кутскизы. Странноесь  ӧжытак. Даралиен мынӥмы "стритартить" (татын явно одӥг адями серекъялоз). Одӥг баллончик краскаен. В итоге со милемлы ӧз тырмы таӵе надписьлы: "Удмуртлык ноку уз быры". Тырмиз кутсконэзлы Удму... шуыса гожтыны тырмиз. А дальше ӧвӧл. Символично со милемлы потӥз...

Собере мыним БВИе. Кошмар просто. Мон валасько, что мынам кускы висе, изем потэ, но сыӵе потэ адӟем шведской (Дарали шуиз озьы.Мон уг тодӥськы кытӥсь) группаез.  Медам нимзэс вунэты шуса бертӥ но..Вунэтӥ. Но всё равно шикарноесь. Мар шуод на:)

Еще мон валай, что туж но туж безмерно, безгранично яратӥсько вынъёсме. Мама: "Туннэ Женяед (выны. 16 арес) зар-зар бӧрдыса султӥз. Мар луиз шуыса юасько. Уг вера. Мар луиз, опять юасько". Женя:"Уйвӧт адӟи, что апай (то бишь мон) машинаен аварие сюрыса кулӥз..."

Вообщем туж странной нунал. Изёно.

11 сент. 2013 г.

Между делом. Так.

На самом деле, удмурт пиос шаплыесьгес, чидасьгес, настырнойгес но визьмогес, чем ӟучъёсыз. Малы?

Удмурт пи одно ваньзэ до конца лэсьтоз. Вераськыны кыӵе ке темалы кутскиз ке (кудӥз солэсь улонзэ может воштыны) со пумозяз однозэ но вуттоз, роспрос ваньзэ тодыса, лыдэ басьтыса. Кельше-а, уг-а со тема тыныд.. вообще неважно. Важно, что со тема солэсь улонзэ воштоз.

Если ке со малпаз, допустим яратоно нылашез, вӧзаз карыны, то со настырно цельзэ достигать кароз. Ӟуч пи кема уз малпаськы, кизэ шонтоз но "мукет нылъёс вань на" шуыса кошкоз. Нош удмуртэз чидалоз. Со может тон вӧзын луыны, юрттыны тыныд котькыӵе дыре.

А. Совсем вунэтӥсько ни вал. Туж бадӟым тау яратоно эшелы. Паймытӥз.(заказывать карылэ солы суредъёс. Уд жалялэ)


Та суред ласянь таӵегес примерно диалог вал):
-Тон монэ вообще уд суредаськы!(типа мон куатаськи)
-Эм.. Эн алдаськы мон тонэ суредалляй ини.
-Ну да..Тани огез подоконник вылын сылэ суредэд, мукетыз тӥни недоконченной...ну огез Парижын...
-Ха, ха, ха..Сыӵе просто верад, между делом.:) Парижын.. Так уг со, конееечнооо..Ма мар со Париж..:)

10 сент. 2013 г.

Бабай

Сӥзьыл вуэмен-а мар-а мылкыд пыкмемын...

Урамтӥ туннэ мыныкум адӟи кызьы пичи внукеныз ӵош мынэ песятай. Соос мар ке мусо гинэ спорить каро вал. Внукезлы примерно 7 арес. Сыӵе вожъяськыса учкисько  таӵеез адӟисько ке.  Туж мӧзмисько бабаелэсь. Со кыӵе ке туж бадӟым тоска, кудзэ номырин но уд мертта. Со мерттантэм яратон. Со сыӵе адями, кудӥныз мон ӧй вутты вераськыса, солы шумпотыса. Мыным вал 3 арес ку со кулӥз.  Тӥ шуоды: "Да мар тон... Тон сыӵе пичи вал на, тон номыре но уд тодӥськы ни". Нош мон ваньзэ тодӥсько на. Мон туж курдасько со малпанъёсты куке вунэтыны. Солэн нимыз Евдоким вал, сое ваньзы Оддой шуо вал. Мынам нырысетӥ кылы не анай, не атай..Уд оске - Оддой. Кыӵе со шумпотэм. Кыӵе со монэ яратэ вылэм. Самой первой со доры, пе, бызьыса мынӥсько вал, маре ке лэсьтыны уг лэзё ке. Со ортчытэ вал. "Пичи нылылы та",-шуыса, пе, пенсиез бере вае вал мар ке мында салам. Мон тодӥсько на быдэс пуйы пряник, стеклянной бутылкаен лимонадъёсты..

...гужем вал. Урамын зоре. Шуныт зорен. Бабай китӥм кутыса поттӥз монэ гидкуазе зор улэ куттэм пыд. Ми ӵошен бызьылӥм зор ултӥ. Уд оске. Со сыӵе шумпотон вал...Мон та малпанэз туж умой тодӥсько на.

Берло, будэме бере тросгес но тросгес со сярысь адямиослэсь кылылӥ, мамалэсь верамъёссэ. Эшшо но юнгес мӧзмон пыӵаз.
Со туж ответственной адями вылэм. "Ижысь доска почётаын вал",-шуэ песяй. Пожарез кысыны юрттэменыз.
Песяй дорысь садын вань писпуосыз со мерттэм. Со туж яратэ вылэм писпу мерттылыны, прививать соосты карыны. Со олокытын но ужамын.  Последний ужез вал гынсапег лэсьтон. Со кадь гуртын нокин но уг лэсьты, пе, вал тузи гынсапегъёс. Мыным но лэсьтӥз вал. Кырым пыдэс быдӟа. Мунёлы кадь.
Со роспрос адями вылэм. Ӝутӥськись адями.
Недавно шедьтӥ военной билетсэ пинал дыр фотоеныз. Кыӵе со чебер вылэм..Песяйлэсь куке юай вал кызьы тодматӥськиды шуса. "Шудонъёсын, азьло сьӧр гуртысь пиос лыкто вал шудонъёсы арганэн". Сыӵе со романтично. Сыӵе со мусо.

Мон туж мӧзмисько. Мон малпасько, вот ведь уйвӧтам но уг ветлы. Хоть отысь ке но адӟыны. Кык пол гинэ адӟеме вань уйвӧтам. Кыкетӥзэ таяз аре адӟи. Бӧрдыса, кот синъёсын султӥ.

...утчасько кадь сое. Мыным шуизы, что со больницаын, со туннэ, пе, кулыны должен. Гроб но сылэ ни кадь корка шорын. "Нуэлэ,- шуисько кадь,- бабайме адӟыны берпуметӥзэ ке но". Нокинлэн нуэмез уг поты. Собере кин ке сюриз кадь. Ваизы больницае. Отысь утчасько, медсестраослэсь юасько, нош соос уг верало. Бӧрдон калэ вуыса, бызьылыса утчасько, тани кулоз ни кожасько. Нокин ӧз возьматы кытын со. Озьы ик адӟытэк кыли...

Вӧзысь матысь адямиосты яратоно. Собере соос кошкозы. Адӟем но потыса уд адӟы ни. Уг яра соос вылэ вож поттыны. Собере ноку но кыл шедьтэмды уз лу ни..

...

Донгысъёс

Насколько можно луыны приземленной адями (блин,визьтэм шуэме уг поты. Мед луоз приземленной), чтобы тон ӧд тоды огшоры арбериосты, нимъёсты. Мынӥсько физкультурае урамтӥ кык нылъёсты кылзыса. Огез мукетэзлы вера выль дышетӥсьсы сярысь (психологиен):
-Ой, он у нас помешан на Фрейде. Везде его упоминает.
-Про собаку что ли свою?
-Нееет. Про Зигмунда.
-Ааа про друга то?
-Да нет же. Зигмунд Фрейд. Психолог был такой. Не знаешь что ли?
-Ааа. Нет, не знала.

Мынам малпанъёсы: "Вот пиз##@* ####@@@@***/ Как так- то??!!"

Ӧч карем кадь эшшо ог пол беразы мыныны тупай, параысь бертыку, со кык нылъёслэн ик. Обсуждать каро толкание ядра.
-Ну так же толкают ядро? (возьматэ кизэ пельпум вылаз поныса. Ну, короче, кызьы правильно толкают:))
А мукетыз спорить карыны кутскиз.
-Дак это метание скорее всего. Ядро же оно большое. Его как-то, наверное, впереди себя толкают..

ААААААА ####@@@@/ Мон уг оскиськы, что сыӵе шузи адямиос дышетско ВУЗын...

7 сент. 2013 г.

S-BAR






S-BAR











 Туннэ ветлӥмы S-BARе. "Дизайнеръёслэн ярмаркаязы".  Бикузин эш отын шудӥз крезен но арганэн. Удмурт шӧм пыртӥз.

Кыӵе ке ӟуч ныл: "А вы как изучали удмуртский язык?" Ми ваньмы ог-огенымы переглянулись мар ке паймыса: "Эээмм..Мы как бы с детства на нем разговариваем". Со: "Круто. Это сейчас модно вроде как всё. Всё это удмуртское. Раньше такого не было. А сейчас это продвигают (Дарали татын туж довольно мыняз). Вроде, я как знаю, бесплатные курсы удмуртского языка проводят". Вал со кыӵе ке разрисованной удмурт шӧм футболкаен, туж охотно учкыса сылӥз нылъёслэсь эктэмзэс, собере ачиз но моктӥськиз мар ке. Шупотӥсько.




Да

Диалог ӟуч филологъёс вискын (милям удмурт филологиен луылэ куддыръя ӵош параос):

-Меня, честно говоря, бесят удмурты. Они не могут сидеть тихо.
-Да, да. Сядут на задние парты и сидят, разговаривают. Базар полный.

Кыкетӥ арзэ кылӥсько ини подобной диалогъёсты, между прочим.

Мон туннэ нырысьсэ (!) вуж удмурт дэрем дӥсяй. Со сыӵе необычно..


6 сент. 2013 г.

Пересьми ке

Ох, думала толон гожто татчы. Малпай даже мар гожтыны. Но ӝыт кулӥсько ни вал кадь. Отравится кариськиськем и по ходу дела студентъёлэн столовоязы губиен шыдэн но "сельд под шубой" салатэн. Ноку таӵе ӧй вал кадь на.

Мон паймисько преподавательёслы, кудъёсыз в возрасте ини. Мыным соос мудрой соваос кадь пото:). Вань милям одӥг курутоез. 70 арес вань ни, дыр. Кильтырок гинэ дӥсяське, буяське, украшениос нуллэ. А кӧня кылбуръёс тодэ. Наизусть. Наверно, быдэс Мандельштамез. Угось, яратоно поэтэз. Ваньзэ- ваньзэ со сярысь тодэ. Мон солы паймисько.  Солэн тодэмтэм книгаосыз ӧвӧл кадь ӟуч литератураысь. Вот зэм но, ваньзэ тодэ.

Мон собере малпасько: а вань меда солэн внукъёс. Всё равно вань, дыр. И сыӵе мон соослы гочаны кутскисько. Мар но со соослы уг вера, дыр. Конечно, мынам но песяе но ӵужае но ас сяинызы визьмо. Но, блин, огез быдтэмын 2 классэз, нош мукетыз 7 классэз. Какой литература сярысь вераськон татын.. Вань пичи, пинал дырзы ужаса ортчемын, гуртсылэсь кыдёке потамын ӧвӧл. Да, конечно, соослэн бесценной улон опытсы. Соос вералозы. Со ласянь тунсыко. Мар ке вужзэ вералозы, гуртысь историосты (между прочим, асьсэос вералозы кыӵе туала пиналъёс аламаесь, кыӵе али улон кӧшкемыт, но соослэн верамзыя азьло улонэз чик но отличиез ӧвӧл). Но кыӵе пичи дыръя тунсыко кылзыны кыӵе ке мифъёсты, допустим, кытчы ке ветлэмзэс... Тем более, мон пичи дыръям туж яратӥсько вал лыдӟиськыны. Эх, шуод ини.

Огез дышетӥсьмы песяез сярысь куке вераз вал. Со, пе, монэ 7 аресозям почти вань зарубежной литератураен тодматӥз. И мыным, пе, со туж тунсыко вал. Собере ини, пе, кутски ӟуч литература борды и валай, что солэсь умоез ӧвӧл.

Пересьми ке, курутой песяй луо:) Обязательно)


3 сент. 2013 г.

фЫлолог

Филолог - со адями, кудӥз тодэ оломаре но.

Вот дышетскыны кутски но мар ке со сярысь малпаськонэ уси. Нет. Мон, зэм ке верано, нырысетӥ курсысен малпасько ни вал малы филологъёсты ваньзы визьмо шуо. Монэ со малпан 3 арзэ преследовать каре ни кадь. Вань дышетӥсьёс шуо вал милемлы (ну али но шуо:)), что филолог - со туж разносторонний адями. Историен дышетӥсь вераз вал, что со туж вожъяське милемлы. "Тӥледлы,- шуэ вал со, - туж повезло. Тӥ ужаськоды кылэн. Со самой таинственной арбери, кудӥныз адями герӟаськемын. И мон туж, али пересьмемъя валасько, жалею, что филологие поступить ӧй кары."  Ӵужапае, кудӥз медик вообще, тоже куке вераз вал: "Мон но дышетскысал отын. Молодец. Тон правильно карид, что отчы поступить карид." Одноклассникеным быдэс сюрессэ автобусын вераськыса куке но бертӥм вал, сюрес то кузь:). Собере со тау шуиз беседамылы: "Вот эшъёсы пӧлысь самой яратӥсько филологъёсын вераськыны. Соосын котькыӵе темаен вераськыны луэ".

Нырысетӥ курсын дышетыны кутским Древнерусской литератураез. Нош со, конечно, герӟаськемын Библияен. Конечно, милемлы лыдӟыны кулэ луиз мае но сое отысь (ма вань литература почти Библиысь сюжетъёсын герӟаськемын так то). Собере лыдӟонъям малпай: "Ведь филолог лыдӟе Библияез. Солы со необходимо, малы ке шуоно сотэк со уз вала произведениослэсь смыслзэ, мар сярысь отын вераське. И неважно, оскисьтэм- а тон, ӧвӧл- а. Библия со юн герӟаськемын улонэн, адямиен. Отысь, между прочим, трос юанлы ответ шедьтыны луэ." Мон пайми сыӵе малпанэлы. Мон, кудӥз шуэ вал, что ноку уз лыдӟы Библияез, озьы малпасько...

Собере ортчимы мифъёсты. Кудъёсыз эшшо но юн герӟаськемын литератураен, повседневной улонэн(незнай кызьы тӥ, но мон котыр адӟисько всякой рекламаосты мифъёсысь нимъёсын, так что сразу валамон луэ мар вузаны тыныд туртто). Мифысь сюжетъёсты, геройёсты тодытэк тон произведенилэн смыслзэ но поверхностно гинэ валалод. Жаль, конечно, что ми греческой языкез ӧм дышетэ. Хотя бы кыӵе "скелетэз", шуод- а мар-а). "Филолог без знания греческого не филолог",- шуиз литератураен дышетӥсьмы. Ну тазэ то валады, дыр, малы.  Бакалавръёс уго. Ылё-кырсёос. Со ик историкмы шуэ вал: "Это хорошо, что вы изучаете латинский. А если знаете, то вообще бесценно. Знать латинский, значит быть полиглотом. Почти во всех языках "витает" латинский".

Туннэ одӥг пара куспын ми тодӥм малы Транссибирской магистраль шонер лэсьтэмын ӧвӧл по плану, а кудддыръя незнай малы лишний, кулэтэм интытӥ кошке, кызьы кылдӥз со понна Новосибирск, малы Томск палтӥ уг кошкы (хотя отӥ кошкыны кулэ вал). Тодӥмы кытысь кошкиз "желтая пресса" веран. Тодӥмы кызьы лэсьтӥзы Панамской каналэз и мар обозначать каре собере "панама" кыл Франциын.. Эшшо оломар но. И сое ми тодӥмы "История зарубежной литературы конца 19 века- начала 20в." параын. Мон просто синмаськи со дышетӥсьлы. Мар но со уг тоды! И вань со верамзэ со быгатэ герӟаны аслаз курсэныз.

Адями, кудӥз ужа кылын тросгес вала, чем мукетъёсыз. Огез дышетӥсьмы вераз: "Меня волнует то, что в последнее время всё больше и больше аббревиатур. Они искажают язык. Коверкают его. Издают ужасные звуки. Ну вот как можно минимальный размер оплаты труда сократить МРОТ? Это же созвучно с "умереть".. " Ма асьмелэн котькытын ирония.
Цветаева, пе, сюлмаськонзэ вера вал эшезлы ку Российской Империя СССР луиз. Со, пе, шуэ вал, что С букваос сое "стиснут", солэн шокамез эркын уз луы.

Туннэ последний параын дышетӥсьмы юа (ритмическая и фонетическая организация текста нимаське вал темамы): "Скажите с какой частотой произносятся молитвы неважно в какой даже религии. Во всех религиях молитвы произносятся с одной и той же частотой". 8 Гц, пе. Именно сыӵе частотаен вераськиськод ке, адями пушкысь ву воштэ аслэсьыз свойствозэ. Соин ик сиськон азьын вӧсясько. Вӧсяськон бере любой сиён, пе, полезной луэ.

Вот.



2 сент. 2013 г.

Диалог. Мусо

Прелестной диалог удмурт сямен (мон шуысал идеальной) удмурт кафеын, то бишь "Перепечкинын":)
-Матэгес пуксьы ай.(пи)
-Я. Пукси. Мар ке вералод-а?:)(ныл)
-Серекъялод тон али верай ке.
-Бон кутскид ке вера ни.
-Мон тонэ кышно вайысал так-то.
-О_о. Мар?
-Мон валай, что тон мыным тупаськод. Асьмеос ог-огмес умой дополнять кариськом шуод-а мар-а.
-(серекъя)
-А мар. Тон мыным ӧд бызьысалыд-а?
-(ныл малпаськонэ усиз, но собере мыняса) Так-то озьы. Бызьысал но, дыр. Тупаськом. Мыным тон кадь карт кулэ, дыр. Тон спокойной, уравновешенной.
-(довольной серекъя).