Керттӥськоно, чильпаськоно, вуриськоно, пужъятӥськоно.

Вань одӥг эше мынам...  Толон чай юыны пырай со доры. Мон:
-Мар-о кариськод ини ай?
-Ма номыр уг...
-Аха, тодӥсько мон. Весь шудӥськод на-а со компьютерной шудонъёсыныд? Помешана прямо...
-Дак.. Ӧвӧл чик...
-Ну вера ай мар кариськод тон?
-...Киноос учкылӥсько..
-Мукет ужен выремед уг луы-а мар-а?
-Маин?
-Ну уг тодӥськы...Шуом, керттӥськыны...
-Мон уг быгатӥськы.
-Как так?! Пичи дыръяд песяед ӧз дышеты-а мар-а?
-Мон 3 аресозь гинэ соин улэмын. 
-А мамаед?
-Ӧз дышеты. "Аслыд кулэ луиз ке, дышод,"-шуиз. Школаын но ӧй дышы. Эше керттыса сётэ вал
-А картэдлэн керттэм носкиен ветлэмез ке потӥз ма карод?
-Мыно базаре но басьто.
-Ма маро со? Пиосмуртлы кельше ук ку солэн кышноез кибашлы. Мынам, например, атае ыжгон носки нуллэ мамалэсь керттэмзэ, яке песяйлэсь. Со шумпотэ.
-Туэ со кулэ ӧвӧл ни. Ваньмыз лавкаын вань.
-Ну а пужъятӥськыны? Али учкы ай... Кӧня олокыӵе но пужъятӥськыны схемаос, чебересь сӥнысъёс...
-Чиданэ уг тырмы. И эшшо со понна уксё кулэ трос.
-Трос ини, пе...Ну уг тодӥськы.. Бисерен уске вырыны чылкак тынад ӟигаред уз тырмы.
Татын мукетэз вискамы пыриз:
-Ма, ярам ини, дугды сое ёртэмысь. Мед пукоз, мар каремез потэ мед кароз.
-Ма эн ай. Мон солы утчасько кельшымон уж. Весь уз пукы уг кино учкыса но компьютер шудонъёсын шудыса.
-Мон вырысал скрапбукинген. Но солы ведь кӧня уксё кулэ.. Тани ужаны кутски ке, басьто но и выро.
-Ужаны кутскид ке, тон шуод, что дырыд ӧвӧл...

Вот сыӵе вераськонъёс. Мон пичи дыръям пӧрме-а, уг-а моктӥськисько вал керттӥськыны но, чильпаськыны но, вуриськыны но, пужъятӥськыны но. Малы меда? Может мамаелэсь адӟем карисько вал? Может школаын олокыӵе но кружокъёсы ветлӥсько вал? Мама шуэ: "Али кыӵе но сӥныс ӧвӧл керттӥськыны но, пужъятӥськыны но... Азьло кыӵе ке вуж кофтаосты кесяса, синысэныз керттӥськоно вал.. Нош али пересьмемъя мылкыд мыл уг поты ини вырыны. Уж соге". Милям вуж коркаямы вань укно шторкаос, оброс, миндерпуйыос, ӝӧккышет пужъятэмын вал...

Мынам малпамея, нылкышно быгатыны кулэ созэ но тазэ но карыны. Азьло ведь бызён азязы учко вал кыӵе со пужъятӥське, вуриське, керттӥське; сандык бичало вал, соин вань нылъёс кибашлыесь вал.


Ваньзэ лавкаысь октӥд ке, мар луоз со.. Тунсыко-а мар-а озьы? Дышемын ини дасез вылын улыны. Эке ке..

Мон  вырисько ке ки ужен, сыӵе мылкыд каньыл луэ.