26 мая 2015 г.

Дышетӥсьлэн ужез.

Мынэсьтым ымнырзэс чуть ли не кисыртыса юало: "И мар, тон турттӥськод школаын дышетӥсь луыны?" Мон оо шуисько. И сыӵе паймем ымнырын ик опеть юало: "И мар, тыныд кельше?" ОО, блин, раз верасько, что школаын ужало! Кыӵе ке демонической уж-а мар-а? Сыӵе но акыльтӥз ке - кошко. Мон огзэ  уг валаськы, адями вала дышетӥсьлэн ужез секыт шуыса, нош нылпизэс со cярысь валатыны ик уг тыршо. 

23 мая 2015 г.

Сюрес вылын

Южной автовокзал. Как обычно: бардак кыӵе ке, мар ке мында адямиосын очередьёс котькуд платформа вӧзын, нервноесь билет эскерисьёс.
Возьмасько автобус, вӧзам пуксизы нылкышноос. Кыкназы но ӟуч. Огез сыӵе помпезной мадама: вакчи стрижка, очки, панама кыӵе ке расфуфыренной бантэн, льӧмлет трикотажной дэрем, босоножки, капрон носки, чиньыосаз зундэсъёс, кияз смартфон. Вакчияк, телосложениеныз кельше "Карлсон и Малыш " мультикысь домоработницалы. Сыӵе современной прабабушка (вераськемысьтыз валай). Кыкетӥез сыӵегес ик, но брюкиен, характерез, шӧдске, простой. Мар ке кутскизы выяснять: коммерческой автобусъёс, яке ӧвӧл-а? Вот малы, пе, ӧз юа мынэсьтым пенсионнойме кассир?-вожез потыса, юа помпезной нылкышно. Кыкетӥез валэктэ, что коммерческой автобус лыктоз та расписания. Вот, шуэ, центральной автовокзалын ваньмыз умой, а татын весь бардак. Жингырто, йыркурме гожтыны косо.

Каллен очереде султӥм, вуиз автобус. Сыӵе консервной банкалы укшась ПАЗ. Тӧдьы, чагыр гожъёсын, сыномем. Юри со помпезной нылкышнолы тупам ини. Сейчас, шуэ, гожто номерзэ, учко сре, что за та "коммерческой" автобус. Вӧзам сылэ пиосмурт. 50 ареслэсь ятыр ини. Копак удмурт, кырыж-мерыж ӟуч сяин вераське. Губыртӥськемын, нырыз ошиськемын ым дорозяз ик, копак курень луэмын ини куэз, синъёсызлы шунды люкетэ, соин исподлобья учке котыр, ӧжытак бандитлы кельше. Кияз пакет. Эскимо сие. И мыным со ӟуч  кылыныз вера (видимо, мон шибко ӟуч ныллы кельшыны кутскиськем сьӧд очкиен ):"Ну вот чо ей. Записывает номер автобуса... Едет и едет чо. Главно ведь едет". "Оо",- шуи. Паймыса шорам учкиз кадь.
Озьы. Удмурт - со котькытын удмурт.

Улон колёса

Мон? Мон жестокой адями шуиськод? Тынад монэ адӟемед уг поты уске? Тынад монэн вераськемед уг поты-а? Кин кӧшкемытгес меда? Тон-а мон-а? Астэ жаляськод? Будэмъя ӵемгес астэ жалямед потэ, оо.

А тон? Тон мар? Малпасько, мар адӟиськиськом ке, сыӵе но кытчы пырон пась уд шедьтӥськы. Синъёстэ ватӥськод. Эке. Ярам озьы ини ке. Улонын оломар но луэ, оветь?

Зар-зар! А тон ӟыгыртӥд кадь азьло сямен, ма эн сюлмаськы шуыса, ваньмыз ортчоз. Йырме маялтӥд.
Шугмем кадь сайкай. Синъёсме усьтӥ. Уг валаськы номыре.

Одӥг эше шуиз вал: "Марина, тон туж ӟеч. Хоть мар мед луоз, но тон туж ӟеч адями кылиськод ".

Озьы, дыр. Ӟеч, дыр. Раз адӟем потостэм адямиен но кужым потэ вераськыны, эшъяськыны, то уж матысь адямиосты адӟем потостэм кареме уз луы.
Гажасько, яратӥсько кыкнадэс но.

22 мая 2015 г.

Эх.

Толон вал удмурт дискотека, кудӥз берпуметӥез вал. Берпуметӥез, кудзэ радъяз Юмшан 57. Мукет сезонзэ кузёяськоз Эктоника.

Малы ке туж мӧзмыт вал. Пуки нырысь клипъёс учкыса бадӟым борддорысь. "Малы та улонэ" кырӟан туж эпичной шӧм пыӵатӥз, аха, та событиелы.

Ваулиналэн туннэ "шудонъёсыз" вал.

Учки на стриптиз, собере кошки.
Малы ке ваньмыз шоры вӧсь вал учкыны. Мылкыд пуксиз.

Мон уг тодӥськы кыӵе луозы Эктоникалэн дискотекаосыз. Наверно, просто кырӟасьёсын. Огпол ветлӥ Алнаше дискотекаязы. Отын ӧй вал нокыӵе содержаниез, отысь немарлы дышетсконэз вал.

Нош Юмшанлэн дискотекаосыз кыӵе ке пуштросэн одно ортчылӥзы. Кыӵе ке обряд возьматон, кыӵе ке сценкаос, сюрпризъёс кырӟасьёсын, вашкала гоу-гоу. Тунсыко вал.

20 мая 2015 г.

Адӟон

Сайкасько но уйвӧтме тодам вайыны турттӥсько.

Уйвӧтасько удмурт дискотекаос будто бы обратно Пепелацын ортчытъяны кутскиллям. Мар сыӵе уйвӧтам пырем. Уг тодӥськы.

Мыным йӧтэ, выльысен отчы ик бертоз удмурт дискотека. Вот чынзэ. Уг паймы, если сентябре озьы ик луоз. 

Малы?
Нырысь ик, барлэн дунъёсыз (кулэ ӧвӧл али правильной адямиосты включать и шуыны, что юон валтӥсез ӧвӧл).
Собере лякыт интыез. Можно боулинген но шудыны, караоке кырӟаны (прикольно луысал, если ке эшшо удмурт дискотекаос дыръя, караокезы но Пепелацын удмурт луысал).

Эшшо сцена туж матын учкисьёслы но эктӥсьёслы но. Артистъёс матын луо соослы. Туж шуныт атмосфера кылдэ соин валче.

Интыез пичи, номыр уд шуы. Зато ваньмыз матын.

Кыӵе ке простой клуб, Резиденция кадь пафосной ӧвӧл.

Мусо пальпотонъёс

Туннэ Удмурт драмиеатрын ортчиз "Камали" студялэн концертэз. 3-тӥ концертэз ини. Туэ Пальпотон TV нимын ортче.

Зал тыр учкисьёс вал. Трос пичиос. Соослэн куараоссы гинэ кылӥсько вал.

Малы, пе, именно таӵе ним. Эркишев валэктӥз: "Пичи Юля юаз мынэсьтым, вот, пе, вань "Карусель" канал. Отын возьмато мультикъёс, кырӟало, экто. А малы ӧвӧл сыӵе канал удмурт мультикъёсын, кырӟасьёсын? Вот. Соин йырин, ми малпамы "Пальпотон TV" ниманы концертмес".
Борддор бордын импровизированной телевизор "Пальпотон TV" гожтэм заставкаен, нош нуисьёс - Полина Келарева но Женя Баранов. Мон соослы паймыса быри) Шаплы макеос. Асьсэды вокщё возьдаськытэк, лад-лад возё сцена вылын, лыдӟытэк верало текстсэс. Только кин вот малпам соослы ӟучомем текст. Незнай.

Нырысь куноос кырӟазы. Якшур-Бодьялась пичи нылъёс но Можгалась "Ерпечкаос".  Асьсэды зэмос артистъёс кадь возизы сцена вылын. Та концертэ пыриськон соослы - туж бадӟым опыт.
Кырӟан висказы лэзьязы удмурт мультикъёсты. Только ваньзэ оглом возьматӥзы, берысьтыз бераз. Кулэ вал, дыр, кырӟанъёс вискын возьматъяны.
Выль мультикез ӧз возьматэ.

Собере концерт нуись воштӥськиз. Полинаез но Женяез воштӥз Света Ручкина, кудӥз луэ Камали студиын дышетӥсь.
Табере концерт возьматӥзы студиысь нылпиос. Пальпотон TV сярысь вунэтӥзы, луиз огшоры концерт.

Шӧдӥське,  будӥллям пичи кырӟасьёс. Артистичноесь. Асьсэды йӧн-йӧн возё сцена вылын, кылем арен ӵошатыса. Чебересь, ог выллемесь дӥсьёсын. Та костюмъёс дасяз соослы Дарали. Пичи мусо дукесъёс но тур-пар яркыт дэремъёс. Туж приятно вал шоразы учкыны.

Лиза Бикузиналэн туэ дебют вал. Та нылашлы 6 арес, но со сыӵе паймытӥз монэ. Малпай вал, что тулкымъяськоз, нош со ке одӥг кылъёссэ но ӧз вунэты, одӥг движениоссэ но ӧз сура. Дораз кадь:) Вань сяськаос туннэ солы кузьмазы кадь:)

Модноесь туэ нылпиос, селфи лэсьто куноосынызы но дышетӥсенызы. Сыӵе туала шӧм пыӵато. Сыӵе изюминкаос трос вал концертын. Кылсярысь, учке, пе, ватэм камераен сцена сьӧры, мар отын каро анайёс-атайёс но кырӟасьёс.

...Бадӟымъёс соос вӧзын мукетгес ик адӟисько ини (Аня Образцова но Катя...  вунэтӥ фамилизэ). Соос самостоятельной артистъёс ини.

Берпуметӥ кырӟан азьын туж сюлэмез вырӟытӥсь кырӟан вал. Пальпотонлэн пытьыез ик ӧз кыльы ини. Удмурт кыллэн быремез сярысь, ӟучомись нылпиос сярысь (кылъёсыз Петр Захаровлэн). Туж секыт кырӟан. Даже берпуметӥ кырӟан ӧз шумпотты ни кадь.

Конечно, таӵе концертъёс шорын учкыса, идеальной картина син азе пуксе. Пичиос кырӟало удмурт кылын. Удмурт кыл пушъе.  Нош огшоры нуналъёсы ӵем меда верасько удмурт сяин? Вань пӧлазы нылпиос, кудъёсыз ӟучомем акцентэн верало кылъёссэс.

Я, бон, кулэ ӧвӧл аламаез сярысь малпаськыны. Концерт пӧрмиз но тросэзлы, ӧвӧл, ваньмызлы каньыл но мусо мылкыд пыӵатӥз луоз.

17 мая 2015 г.

Удмурт этикет

Удмуртъёслэн кызьы? Мар ке сёто, нош соос йырзэс-кизэс шонаса:"Уг, уг, уг, уг, тау!" Но всё равно сре басьто ини, ку куиньполгес косозы. Особенно сектаськыкузы. Особенно нылкышноос.
Мусо адӟиське. Серем.
Чай но юыкузы.  Куинетӥ чашказы бере:"Уг, уг, уг, уг, тау!" Но всё равно эшшо кыксэ ке но чашка кузё секталоз на.

Милям песяй озьы. "Песяй, ме, мороженой ". "Уг, уг, уг, уг, тау!" Куинь пол, вить пол пока ме уд шуы - уз басьты. "Сиём -а мар-а ни уске..."

Удмурт этикет. Сразу басьтӥд ке - алама, невоспитанной адями.

Барангы

Бертӥсько. Льӧмпу зын ныре шуак шуккиз,автобусысь потӥ но. Гурт чебер луэмын, вож-вож. Бертӥсько бакчаос бертӥ. Милям бакчаосмы ферма шоры учко, 7 бакча милям урамысьтымы. "Оо, -нокин но мерттымтэ на, -шуыса бертӥсько". Мамаен песяй пуко барангы вандыса. "Али гинэ верасько вал ай, Марина барангы мерттыны мед бертоз шуыса, "- вазиз песяй.

"Мон Седыкъёс доры кошки барангы мерттыны", -шуиз мама.  Таослэн бакчазы милемлы матын. Одӥг бакча гинэ вискамы. Ок, шуыса, выжъёсыз миськыны кутски. Мама бертэ. Москва палась зор, пе, лыктоз, мерттоно туннэ однозэ  ик, тани ато ӝыт зороз. Чаляк урам кузя адямиосты бичаз, звонитьяз но бакча тыр адями люкаськыса, кысык мерттӥмы. Ӝӧк сьӧрын только и вераськон: блин, чаляк мерттоно, зор вуоз. Синоптикъёс люкаськиллям.
Ӵуказеяз со 7 бакча чаляк гинэ мерттӥськиз. Ваньзы зорлэсь курдазы, только Москваысь зорзы мар ке ӧз ик дырты кадь. 

Огез дорысь мукетэз доры ветлыса, барангы мерттыса ик жади кадь.

Барангы мерттон -  со туж серем мар ке уж. Оломар но кылӥськод, оломар но тодӥськод. Одӥг нунал куспын 3-5 бакча но мерттӥськод кадь. Бакча бере ик потто ведраен ву, ки ӵушет. Миськиськод кидэ но пыриськод сиськыны. Ӝӧк вылын сугон кальча, помидор, кияр, колбаса, шыд, нянь, юон. Пукиськод, вераськиськод, кылзӥськиськод. Чарказэс шукко:"Я, барангыды асьтэ быдӟа мед будоз".

Вань пиосмуртъёс, кудъёсыз туж тунсыко  "мертто". Учыр вера огез: "Мерттэ, пе, буш ведраен, будто бы картошка тыремъяське музъеме, собере ваньмыныз ӵош сие-юэ. Бесплатно сектало ук. И ветлэ озьы бакчаос мерттыса. А мон сре сӥзьыл малпасько, мар ай та метырен, метырен барангыос потылэмын ӧвӧл."

Ымы кык нунал куспын жадиз вераса:"Я, я тани дышетсконэ как быриз, сразу бизё.  Ява?" Акыльтӥзы юаса, ку тугандэ дорад ваёд, ку бизёд, кытысь туганэд. Мон гинэ на будто бы бизьытэк кылиськем.

Я тани усе кадь ини зорзы. Шумпотозы ини.

13 мая 2015 г.

Мунчо кузё

Эше гуртысь вуиз но мактаське: "Гуртын сыӵе но умой! Куазь вообще! Мунчое пыри!"

Мон уг валаськы мунчолэсь прелестьсэ, кылсярысь. Адямиос шузимо кадь мунчолы. Малы мон сыӵе равнодушно меда со мунчолы? Гуртын улэмын шуыса? Дак вань гуртъёс ярато мунчоез. Эшшо ке таш-таш веникен пыро. Милям дорын вениклэн кылдэмез ик ӧвӧл.Мунчомылэн веник зынэз зынъямез ик ӧвӧл (а, вань, алдасько. Куке Бикузин, Тихнова но Ворончихина ветлӥзы вал валлян арын куное, юри Бикузинэн ветлӥмы вал кызьпу вайёс ышкаса). Пӧсь мунчоез но милям нокин уг яраты, нош адямиос горд кушман луытозязы париться карисько.

...Тодӥсько на, мар ке пичи дыръям (10 арес может вал) мамалэсь вожзэ поттӥ, а как раз песяй дорын мунчое мар ке пыриськом вал, и мама монэ сыӵе зол веникен пыртӥз, что со дырысен веникез адӟем но уг поты ини...

Нош кылем гужем, арт-экспедиция дыръя, олокытын но мунчое пыримы кадь. Но особенно быдэс улонам тодам ваё, дыр, Кабачи гуртын пыреммес. Ми Марайкоен незнай малы самой последний пырын кылимы. Нош ми азьын пырисьёс туж кема кыллизы мунчоын. Изем потэ ини, нош одно гылтӥськоно. Дыр но 12 час уйин, зорыны но кутскем. "Ойдо, -шуисько, - ровно12 часэ ум потэ, алама мар ке ато". Потӥм 12 час бере. Нош ми азьын пырисьёс ву ӧжыт кельтӥллям. Мунчо вужгес ини, пеймыт бордоръёс, лампочка ляб ӝуа. Ӝоканы кутски, хотя пӧсь но ӧй вал ини. Психовать карыса. Вузы небыт, будто майтал уг кошкы бордысь. Ву вокщё быриз. Черекъяса ӧтиськом эшъёсмес мед ву ваёзы шуса, нош соос уг кыло, зор люкетэ. Кызьы но озьы пырыса, потӥмы.

Таӵе учыръёс бере, чынзэ но уд яраты мунчоез.

Дуннелэн муртэз.

Пукисько огнам, гожъясько диплом. Нокин уг ёрты. Гань-гань. Нокытчы нокин уг дырттыты. Шуд. Ненег.

Укно сьӧрын вож-вож. Куинетӥ этажозь писпу йылъёс, нош кызьпу вокщё бесконечной кадь.
Утялтӥськиськод, яке сиён пӧраськод диплом cярысь малпаськыса и вдруг йыре лыктэ малпан, шаплы лыктӥськод ноутбук сьӧры но гожтӥськод. Ганяк.

Куартолэзь праздникъёслы огнам кылиськем каре, вань эшъёс доразы бертӥллям. Мӧзмыт, мар карыны паймиськод кадь. Телефонэ учкиськод - номыр вылез. "Диплом" папкаез усьтэм уг пот. И кутски лыдӟиськын. Озьы ик быдэс нунал куспын лыдӟиськыса дыр ортчем. Укно шоры учки но - пеймыт ини.

Дышемын кадь быдэс улондэ адямиосын улыны. Котыр адямиос. Нош тазьы - огнад. И вань прелестьсэ валаны кутскиськод кадь. Ачид аслыд кузё. Писей кадь. Кытчы мынэмед потэ - мынӥськод, нокин тонэ уг куты. Мар сиемед потэ - сииськод. Ӵукна но ачид сутӥськод. Будильниктэк. Нокытчы дыртонэз ӧвӧл. Параос быремын.

Яратӥсько куартолэзез. Туж. Ваньмыз выль кадь. Омыр но выль. Со укно cьӧрысь пичи, вожектӥсь, чилясь куаръёс шоры учкыса сылӥськод но мылкыд сразу ӝутӥське. Тылобурдоос ӵуканысен кутско чирдыны. Сыӵе дыръя, нокыӵе крезьгур лэзем уг поты. Пукиськод шыпыт комнатаын соосыз кылзыса. Машина куараос йӧназ уг кылӥсько. Умой.

Гань-гань.

Может берпуметӥ сыӵе гань-гань куартолэзе.

8 мая 2015 г.

Азбар туса

Мынӥсько картӥ, васькисько Горький ураме. Укмысысь потэмын ини, ӝыт. Малы ке шыпыт, машинаос трос ӧвӧл. Кытын ке тылобурдоос кырӟало, ымнырез веша шуныт тӧл, лӧсъяське шашлык зын, юбо тылъёс городэз небыт каро. Умой...

Дарали ортчытэ туса. "Сахарлэн" азбараз. Ышык инты. Котыр улӥсьёсын коркаос ӧвӧл, котькӧня шулдыръяськы, куашеты.

Таӵе Даралилэн ӝытъёсыз ӵем уг ортчыло, соин но соосыз возьмаськод кадь. Мар ке выль эмоциос басьтыны.

Мар ке быдӟа бордор бордын проектор возьматэ удмурт видеосты, клипъёсты. Шудэ мукет крезьгур и со клипъёс мукет шӧмо луо, кыӵе ке туж эпично адӟисько. Лэйкыт, дыртӥсьтэм крезьгурез воштэ ритмичноез. Адямиос экто, ваньзы асьсэ пуш дуннеязы. Шунтӥсько, медам кынме шуса. Кин ма дауртэ. Ял карисько кадь Резиденциялэсь, Эктоникалэсь.

Дарали ветлэ перепечъёсын ваньзэсты сюдыса. Вылаз лыз бархатной саестэмен, куэм штаниен.

Кытын ке сэрегын Кузебай Герд гимназиысь нылпиос лэсьто футболкаос вылэ "т★у!" гожтэм. Соос мукет атмосфераын, шӧдӥське, что соослы туж кельше.

Пикуль но Мурӝол туннэ кырӟасьёс вал. Соос туж крутоесь. Мурӝолъя ваньзы эктӥзы, тэтчазы. Уг луы кадь соя тэтчатэк.

Синйылтӥ кызьы кыӵе ке нылаш, бигер тусо, лыктӥз Мурӝол доры, но туж тунсыкъяськыса, вераськыны соин кутскиз, нош собере эшъёсыныз туспуктэм лэсьтӥзы.

Берло юасько мурӝоллэсь мар тодмотэм адямиос со вал шуыса. "Прикинь, - шуэ, - со вообще левый адямиос, кудъёсыз Ижысь ик ӧвӧл кадь. Бигерысь-а мар-а. Соос ужзы бере берто вылэм и кыллӥллям урам трос кырӟанме. А как раз туннэ нырысьсэ учкиллям клипме. Соос паймыса юазы, тӥляд, пе, тазьы удмурт вечеринкаос лэсьто? Собере фотое, пе, ойдо пуксём ".
Кыӵе идиллистической суред адӟиллям. Карлэн шораз, кытын ке во дворах удмурт туса. Ачим котькуд нунал мед адӟысал таӵеез.

Калленоме мынэм потыны кутскиз.

5 мая 2015 г.

Мусо Усо

Инмаре! Корка тыр гужем зын. Укноос усьтэмын, пыре сайкыт омыр, кудӥз сураське дор омырен. Та зынэз мон ялан зынъясал.

Нуналысь нуналэ писпуос вожгес но вожгес луо. Тузон пурӟе, адямиос каллен кутско барангы, ӵуж кушман мерттыны.

Ваньзы кузьылиос кадь утялтӥсько.
Вуж Эграысь бертӥ попуткаен. Бертӥ но пайми - юбоос борды флажокъёс ошылӥллям. Кислотной буёлъёсын. Син флажокъёс борды ик кыле. Вунӥз ни вал кадь. Юбоосыз извасткаен буяллям. Син мальдэ со тӧдьы буёллэсь.

Нылпиослы шумпотон - лумбыт великъёс вылын. Гурт пумысь, мукет пумозяз уллёен ворттыло.
Шунды шунтэ. Гужем кадь.
Тани скоро льӧм сяськаялоз.

Яратӥсько куартолэзез. Сайкытэз понна.

Эктон

Дак вот. Мон нырысьсэ вуи Эктоникае Алнаше. И кин тодэ вал, что мон отчы вуо Грак ёросысь, а не аслам Алнаш ёросысьтым? Мынам ваньмыз мыддоринь.

Богданлы, пе, кырӟано, соин ик ми но мынӥмы отчы. Мынэммы со мукет история. Грак пиос эшшо какой пиос :) Солань-талань бусыосты котыръяса ветлыса, вуимы Алнаше, быдэс машина трос удмурт попса кырӟаса.

Сие действие номырин но уг висъяськы Резиденция клубын ортчись удмурт дискотекаослэсь (татын только барзы ӧвӧл). Озьы ик сцена вылтӥ тэтчаса, серекъяса, черекъяса ветлэ Петя Пушкин, ну вӧзаз эшшо вакчи дэремен но кузь каблукъёсын Вероника Ваулина. Шораз ик сыло Электроникъёс. Огез жуммемын (татчы гожтӥсько вал предложение, но со туж сюлэмез вӧсь карись потӥз мыным), нош огез задор мылкыдын, попрыгунчик кадь, тэтча. Беразы солань-талань ветлэ видеокамераен Павел Эль. Шӧдске "эль" трос ик юэм.

Мыным потӥз, что отын трос школьникъёс вал. Хотя, незнай, паспортэз учкисьёс вал кадь.
Балин. Так ке сыӵе арсыз, ку шоре  туж вызывающе учке 4-5 ареслы тынэсьтыд пиналгес  кудӟем пияш. Со, считай, мынам выны быдӟа пиос. Буэ.

Син жадиз всякой тыл эффектъёслэсь. Пересьмисько, лэся. Дорын пуконо.

4 мая 2015 г.

Адӟонъёс

Куартолэзь! Куартолэзь, наконец-то!

Кемалась кытчы ке потам вал ини. Нырысетӥ числое ик Эгра Алина ӧтиз вал Вуж Эграяз.
Мынам кемалась потэ ни вал адӟеме та легендарной гуртэз (вуылэме вань часта, ӝыт. Только гуртэз адӟыса ӧй вуы). Михаил Атаманов ук татын вордӥськемын. Мынам дипломам солэн ужез кутэмын.
Так ке Алина ӧтиз милемыз ваньместы, кин ветлӥз арт-экспедицие, но мынон нуналэ, конечно, ми кылимы 4 кузя: мон, Марайко, Богдан но Образцова. Синъёс ӥӧназ усьтӥськемын ӧй вал на, мынӥмы жд вокзалэ вазь ӵукна. Алнаш станциозь мынӥмы сылыса, ёп. А мон малпай изё.
Вуим Менделеевске. Пумитаз машина но нуиз Вуж Эграла. Татысен со 18 км. кемын.
Та гурт интыяськемын ышык интыын. Гопын. Котыраз вырйылъёс. Алиналэн коркаез кыдёкысен ик горд липетэныз пиштэ.

Мӧзмиськеммы лэся.

Сюдӥз но шуиз:"Клубе мыном, тӥледыз отын возьмало ини". Ну капец. Одно кулэ вал-а вераны ваньзылы? Шыпытак ведь ветлэм уг луы, одно ваньзы мед тодозы.

Милемыз возьмало вылэм "Эгра кенакъёс". Ансамбльзы сыӵе, колоритной нылкышноосын. Кырӟазы, веразы. Милемыз но кырӟаны косӥзы. Ми нош дыг-мыг. Таняен Лиля ӧвӧл, мар карод? Кызьы но озьы кырӟаммы пӧрмиз кадь.

Тодматӥськимы. Мон султӥ но нимме вераны, клубын ужась нылкышно чабиськиз: "Бон та Валялэн нылыз ук!" Мон мар вераны пайми. Одноклассницаез вылэм, ымныр тусы, пе, мамалы кельше.

Клубазы ческыт табань пыжо. Вӧё. Али малпаса, опять сием потӥз.

Собере гурт котыръян кошким. Жуг -жаг трос на. Нырысетӥ май, утялтӥськисьёс ӧвӧл на. Нош милям гуртын утялтӥсько ини, дыр. Обычно 1-тӥ мае гуртэз утялто, нош 2-тӥ мае - шайвылэз.
Туж странной гурт потӥз, мукет сямен син азям пуктӥсько вал. Мыным йӧтэ вал, что та кыӵе ке идеальной удмурт гурт, вуж коркаосын. Нош татын выль коркаос, огез огезлэсь крутойгес.

Но так ке та гурт кема улоз на, дыр. Малы? Уж луоз. Вӧзазы ик сылэ завод (пуктӥськисез но пуктэмез вань. Пукто китаецъёс), кудаз аммиак лэсьто. Кыдёкын ӧвӧл, 2 км., дыр. Нош таӵе заводъёсты, пе, гуртъёслэсь 40 иськем кемын пуктылоно.
Бускель гуртазы, пе, 30 корка пуктӥське.

Со завод котькытӥсен адӟиське. Кыдёкысен, тузон пӧлын, со черк кадь адӟиське, нош уин - инопланетной корабль кадь. Уин со копак пиштэ, сюл кузьда ӝуась тылъёсын бинемын. Кыӵе ке монстр. Нош улаз, гопын,  Вуж Эгра, аслаз юбоосыныз, кудъёсыз сыло ӝуаса, чур гинэ.

Сыӵе уин адӟонэз адӟи мон, куке бертӥськом вал Вуж Эграе  Алнашысь, Эктоникаысь, бусыостӥ.

Тазьы ветлыку, быдэс дунне каллена кадь. Номыр сярысь уд малпаськиськы, гань-гань калгиськод, выль интыен тодматскыса.
Ӵемгес ветлоно тазьы...