Ваньмыз берло

Первой час уин. Пока кубистае парлана газ вылын, малпай гожтыны (сием потыса, кулӥсько ини).

Яратӥсько Даралилэсь позыръяськонъёссэ. Туннэ (наконец-то) ортчиз кема возьмам "Берло чупало" ужрад. Резиденцилэсь акыльтэм адямиос кыстӥськизы татчы, дыр. Та мукет шӧмъем ужрад. Выльдӥськем БВИ-ын. Пока учкыса ветлӥсько клубез, модалиос берпалъёсынызы шонаса ветлыса вуттӥлям. Выльёсыз пӧлазы вань. Кыдёкысен адӟисько: мылысь-кыдысь шузиясько, экто. Асьсэды возьматэмзы потэ.

Туж модноесь дӥсяськемын, немар вераны ик: удмурт дэремъёс, саестэмъёс, кислотной буёлэн шапкаос, сьӧд очкиос, курутой кроссовкиос, конопляен носкиос но африканской сямен пунэм йырсиос. Ческыт салат, кӧтэз тырытӥсь. Адӟем карымон  пример, кызьы ветлоно таӵе ужрадъёсы. Поттэлэ песяйёстылэсь-ӵужайёстылэсь сандыкысьтызы дэремъёссэс!
Ачиз Дарали но синмаськымон модная. Лилия Брик ми сое туннэ нимам.

Калык бен, огшоры дӥсен. Кышкалогес, дыр, эксперементировать карыны, яке уг быгато, яке мон кадь, кышкало басьтыны супер-крутой юбка, кытчы собере мон соин мыном шуыса.

Эктыны но туж секытэн кутскизы. Модалиос тэтчало котыртӥзы, ойдолэ эктом, шуо, нош калык сылэ учкыса.

Тросэз Белослудцев шоры учкыны лыктӥзы, дыр. Финляндие, пе, мынэ чебер пиосыныз. Пелез шумпоттӥсьёс. Кыӵе мон наслаждалась барабанщиклэн шудэменыз! Огпол но сыӵе крутой шудӥсез адӟеме ӧй вал на)
Тузиесь, чынзэ ке. Соосты но я мар пыртозы фин учебникъёсы?

Собере кутскиз невнятной действие. Шузияськон "Шунды" пияшъёслэсь. Перфомансъёс (кудъёсыз не катят ини, чынзэ ке), безбашенной эктонъёс. Соос шоры тунсыко вал учкыны, соосъя шузияськыны. Со мар ке выль. Егит, задор.

Трос егит ымныръёс, трос тодмотэм ымныръёс.

Жаляса верано, Пикулевез кылзыса ӧй вутты.

Зато вуттӥ кылзыны Бехтеревез. Мар ке жестокой действие вал. Остэ Иньмаре, шуизы, дыр, ваньзы. Но со вал круто. Костюмен, при параде, но тӧдьы кепкаен Бехтерев, нош вӧзаз чикуляос дешевой, пластмассовой чилясь монистаосын зырасько. Гольык кӧтъёс, пеканъёсты облегающий колготъёс, кузесь каблукъёс, чилясь кофтаос. Только что пырем адями номыре ӧз валасал, дыр. Да и сылӥсьёсыз тросэз ӧз валалэ лэся.

Крезьгуръя ке, мыным кельшиз.

Тунсыко вал но ваньмыз погмаса сётэмын. В принципе, ужрадлэн нимыз кадь. Берло валалоды. Берло чупалоды.