14 нояб. 2015 г.

Машка

Магистратураын вань предметме "Детская литература". Тунсыко преподаватель вера туала пичиослы гожтэм веросъёс cярысь. Лыдӟиськом но шумпотӥськом. Асьмелы выль дунне усьтӥськом. Тӥ но лыдӟе. Шуом, Аника Торлэсь "Остров в море", Шмиттлэсь "Оскар и Розова Дама", Марина Арамштанлэсь "Когда отдыхат ангелы", Приставкинлэсь "Ночевала тучка золотая". Туж тунсыкоесь.

Берлозэ лыдӟимы Ульф Старклэсь "Звезда по имени Аякс" вероссэ. Зар-зар бӧрдыса. Школаын. Урокъёс вискын часта лыдӟи.

Вераське пуны но пияш cярысь, туж огшоры история. Пуныен ӵош будо, висё, поръяло. Собере пуны пересьмыса, кулэ. Но солэн вужерез кыле пияшлы, солы кузьмало выль кучапи.

Малпаськоды, мар, Сергеева, сыӵе ванильная-а мар-а, что простой сюжетъёслэсь синкылиосыд пото?
Зэмзэ вераса, мон ӧй но бӧрдысал, дыр, если ке аслам со выллем ик историе ӧз луысал. Только не пуныен, а скалэн. Оо, огшоры скалэн (гожъяй но ни вал, дыр).

Скал,  мон понна, со вань пудо-животъёс пӧлын королева кадь. Вот милям скалмы сыӵе ик вал. Дыртӥсьтэм, туж своенравная, курень, нокыӵе но куӵо-маӵотэк. Сое вузазы. 2 яке 3 ар ортчиз ини со дырысен. Отчыозь мон сое тодӥсько вал сомында, кудмында асме. Со скал мон быдӟа аресэн. Пичи дырысен сьӧраз ветлэмын олокыти утчаса, пастухысь пегӟылон дыръяз. Вож потэ вал сыӵе дыръя. Дэри, сӥзьыл куазен яратэ вал пеганы. И утчаськод сое, ӝомал луытозь кыти ке гурт пумысь, собере бертӥськод улляса, шлёп-шлёп. И сыӵе али син азям пуксе мӧзмыт идиллия: пурысь куазь, (сӥзьыл омыр но пурысь луэ кадь), гольык писпуос, напра котыр, пурысь коркаос. "Кызьы нылыд тодма скалдэс?"- паймыса, юало, пе, вал гуртоос (а мон начальной классысен озьы утчаса ветлыны быгатӥсько ни вал). "Чынзэ но. Кызьы?"- юа вал мама. "А солэн синъёсыз самой ӟечесь. И вераяз туж чебер пужы". Куке но утчаны ӧй мыны, школаысь лагерьлэн то ли открытияз дасяськиськом вал, то ли закрытияз. Скалмы бертымтэ. Мама сюлэм шуген (а мон виноват, что ӧй мыны скалэз пумитаны пастухысь), сайкатӥз монэ вить часэ ӵукна но ӵошен мынӥмы утчаны. Сыӵе но соку воже потӥз вал солы. Берло аръёссэ, ку мыным 17-19 аресъёс вал, Машкамы (скалмылэн нимыз) ӵем висьылыны кутскиз, пересьмиз. Мама вералляз:"Мынам уг поты адӟеме кызьы со кулоз. Лучше вузало но син азям уз кулы". Пока мон городын, вузам. Нуназе жингыртӥз но вераз: "Вузай. Бадӟым машинае пуктӥзы но нуизы. Дол шорам учкыса, кошкиз. Синъёсаз синкылиос потӥзы. Ӧй чида, ачим но бӧрдӥ". "Лучше дорын, пересьмыса, мед кулоз вал", - синкыли пыр верай. Собере, тодӥсько но, изем луытэк, опять скалмы cярысь малпаськыны кутски но, ӝожомыса, бӧрдыны кутски. Бертыса, гид дортӥ спокойно кошкеме ик уг луы вал, синкылиос вияны кутско вал. Али но ортчыкум чепылляны кутске. Малпасько ке со cярысь, ӝожомисько. Со кыӵе ке анай кадь, песяй кадь. Кыӵе ке семьяысь мурт кадь вал, кудӥз кулӥз, кудзэ уд берыкты ини..

Машка бере, так скал вылэ вуыны ӧм ни быгатэ. Ваньзы оломар кадесь. Куӵоесь, чебертэмесь. Кыскыны но уг луы. Огзы борды но сыӵе зол уг ни биниськы, дыр.



Комментариев нет:

Отправить комментарий