13 июн. 2016 г.

Гербер дыръя

Котькуд нунал ортче уйвӧт кадь. Луылэ-а тӥляд озьы? Мон уг тодӥськы ни мар толон сии, мар кари, мар мон вылын дӥсямын вал. Ваньмыз чаляк сылме, кызьы сылме ӵукна адӟем уйвӧт. Вань детальёс ышо, тодад вайыны тыршиськод но нокызьы уг пӧрмы.

Озьы лобаса быдэс июне ортче ини. Дорысь Иже, Ижысь доре.

Гербер ортчиз озьы ик, уйвӧтын кадь. Мар ке весь акыльтытӥз. Тополь пух ныре, пеле, синме, копак мугоре лякиськиз. Гужем вискын тол вуиз кадь. Уйвӧтын кадь.

Ужай. Милемлы кулэ вал ортчытыны нылпиослы шудонъёс 4 час ӵоже.

Вӧзын Шундылэн площадкаез жингыртӥз. Учкем потыса ик кыли.
Мукет палаз Айкай потаз.

Адямиос ветло солань-талань, ял каро, сисько, шулдыръясько, нош мон вӧзтӥ тэтчало нылпиос. Со, видимо, навечно...

Удмурт дэрем басьто шуыса лыктӥ вал. Москвина лыктымтэ. Нош палэнынгес Угланова гочатыса вузаськиз кильтыръяськонъёсыныз.

Ма бон. Сомында ужам бере, тунсыкоез кыльымтэ ини. Котырски огпол но бертӥ. Мар ке адямиос шулдыръяськыны уг ни быгато кадь. Яке программазэ воштоно.

Тунсыкоез вузаськон азбарын но ӧй вал. Котыр вузало разноцветной, одноразовой ширпотрёб нылпиослы. Ческыт вата зынлэсь ӧскем потэ...

Туэ мон нырысьсэ сии "вӧсям" ӝук. Огпол но Ижын Герберын ӧй сиылы на вал. Вот что, значит, ужаны бюджетной учреждениын.

А вообще потэ вылысен пичи дыре. Уг поты арысь аре адӟеме кызьы ваньмыз пересьме, сисьме, куажга.

Пичи дырысеным, кызьы асме тодӥсько, Усоен Кузёбай вискысь бусыын будо пужымъёс. Одӥген одӥген соос сыло. Пичиысеным соос мыным пото волшебноесь.
Адӟи бертыса, огез куасьмыса, жыныя тӥяськем. "Кызьы? Малы? Соос же волшебноесь!"- йырам чилектӥз. Мама гинэ шуиз: "Пересьмемъя ваньзэ гинэ ваньзэ валаськод. Озьы гинэ адӟиськод воштӥськонъёсыз". Ньылонам комок кугӟаз.



Комментариев нет:

Отправить комментарий